Pequefilmes 2024 | Obradoiros: cine de sombras

Que tal se nos convertemos en cineastas por un día? Cine e teatro de sombras chinesas únense nestes obradoiros que se enmarcan na programación do festival de curtas infantís Pequefilmes. Así, ademais de gozar das mellores producións chegadas de diversos países, o público miúdo tamén poderá experimentar creando a súa propia peza. Na actividade adaptaremos un conto breve a partir dun texto guionizado previamente. Desta maneira a cativada traballará en grupo en varios aspectos:

  • Deseño e construción de personaxes e escenarios
  • Preparación das caixas de luz para crear o entorno 
  • Ensaio de animación e dobraxe
  • Gravación dos planos

Rematado o obradoiro farase a montaxe de imaxe e son e as pezas resultantes publicaranse nas redes sociais da Cidade da Cultura. 

IRIA FAIFÁN

Ola! Chámome Iria e son unha ilustradora nada en Cataluña e crecida en Galicia. Non se que sería de min neste mundo sen o debuxo. Supoño que me acabaría adaptando, pero grazas a el aprendín a observar e a valorar a sinxeleza. Tento ter presentes estas dúas cousas tanto nos meus traballos como na miña vida persoal. Despois de dar voltas por diferentes lugares, instalei o meu fogar e o meu estudo nunha aldeíña do rural galego. Para encargos, propostas ou por pura curiosidade podedes escribirme aquí iriafafian@gmail.com